हप्ताको पहिलो दिन आज आइतबार सुनको भाउ तोलामा एक हजार सात सय रुपैयाँले बढेको छ। सुनको भाउ आज तोलामा एक लाख ३ हजार ५ सय रुपैयाँ पुगेको नेपाल सुन चाँदी व्यवसायी महासङ्घले जनाएको छ । यसअघि अस्ति सुनको भाउ तोलामा एक लाख एक हजार ८ सय रुपैयाँ थियो ।
सुनको भाउ अझै बढ्न सक्ने सम्भावना रहेको महासङ्घका पूर्वअध्यक्ष तेजरत्न शाक्यले बताउनुभयो । अमेरिकामा बेरोजगारीको सङ्ख्या फेरि बढ्न थालेसँगै सुनको भाउ बढ्न थालेको उहाँले बताउनुभयो । गएको माघ १९ गते सुनको भाउ अहिलेसम्मकै उच्च थियो ।
त्यतिबेला तोलाको १ लाख ७ हजार ५ सय रुपैयाँ थियो । त्यसपछि भाउ बिस्तारै घट्न थालेको थियो । तर, फेरि अहिले भाउ बढ्न थालेको हो ।
