मोरङ माओवादीमा संकट देखिएको छ । रंगेली नगरपालिकाका मेयर दिलीप बगडिया एमाले प्रवेश गर्न लागेका छन् । उनीसँगै करिब दुइ हजार नेता कार्यकर्ता एमाले प्रवेश गर्ने कार्यक्रम रहेको एमालेले जनाएको छ । उनीहरुलाई पार्टी प्रवेश गराउन आज दिउँसो अध्यक्ष ओली रंगेली पुगेका छन् ।
बगडियाको पार्टी प्रवेशका लागि एमालेले रंगेलीमा जनसभा राखेको हो । सभामा पार्टी प्रवेश कार्यक्रम राखिएको एमालेका मोरङ सचिव रुपेश खतिवडाले जानकारी दिए ।
उद्योगी बगडिया माओवादीबाट रंगेलीको मेयरमा निर्वाचित भएका थिए । मेयरको कार्यकाल सकिनै लाग्दा उनी एमाले प्रवेश गर्न लागेका हुन् ।एमाले प्रवेश गर्न तयारी गरेपछि माओवादी केन्द्रले बगडियालाई फागुन १५ गते पार्टीबाट निष्कासित गरिसकेको छ।
